باعوا ثلاجتهم علشان ياكلوا ((حكايات عدنيه))

عدن الخبر
اخبار عدن

صحيفة ((عدن الخبر)) كتب محمد جعبل الشعوي إعلام عدن الخبر
اليوم حصلت لي قصه بالصدفه في الساعه الحاديه عشر قبل الظهر طلعت من البيت لشراء نص كيلو باميه وبالصدفه كان واحد يتحدث مع الخضري ويقول ارجوك شفلي واحد على معرفتك وهو يقصد بذلك زبون من الذي يعرفهم صاحب الخضار. ف خخخخضول مني تداخلت في الكلام لما نظرت في وجه الرجال وشفت عيونه تملأها الدموع قلت لصاحب الخضار ايش في قال ياعم هذا يقول عنده ثلاجه يشتي يبيعها ماعنده فلوس.

انا اخذت الموضوع بجديه وسألته وين الثلاجه قالي هنا بالبيت قريب قلت يالله تعال وريني الثلاجه قال الله يحفظك باتشتريها قلت اول اشوفها يمكن خربانه قالي لا والله شغاله مايحتاج المهم مشينا على بيته ، بيته بنفس الحافه التي اسكنها وصلنا عند الباب دق الباب فسمعت صوت اطفال وهو يقول لهم طريق معي واحد ماهي الا لحظات فتحت البنت الصغيره الباب دخلنا ساني الى المطبخ شفت الثلاجه ممتازه وشغاله فتحتها وشفت فيها جركل او مغرف ماء بلهجتنا وبنفس الوقت اسمع تمتمة بكاء امرأه من غرفه بجانب المطبخ البيت غرفتين بعد سؤالي له كم غرفه عندك..
ونحن نتكلم عن السعر قال ياخي اعتبرها ثلاجتك وشف كم تسوى يالله فين بيتك انا بحملها الان الى بيتك هنا ايقنت ان الاسره ذي في حاله لايعلم بها الا الله قلت زوجتك ليش تبكي الرجال معاشي تمالك اعصابه بكى بكاء احرقني وفجأه تكلمت زوجته من شق الباب قالت ياعم الله يهنيك بالثلاجه قلت وليش بتبيعوها وماعندكم ثلاجه قالت لي والله الذي رفع السماء لنا يومين بلا راشن يعني بلا اكل
مسكتني العبره في صدري عبرة البكاء قلت خلاص باروح اجيب الفلوس من البيت واجي انا بيتي قريب من هنا قال الرجال خلاص باجيبها الان شلها معي لاعند الباب وبتحملها ونمشي مع..
قلت لا لا انتظرني ذلحين باجيك واهله من هناك يقولو باترجع ياعم صحيح ولا ماتشتيها قلت لا والله برجع والثلاجه مليحه باشلها..
روحت البيت وبيدي الباميه قالو لي اهلي تأخرت وين عادك رجعت وليش وجهك شاحب مالك ايش في
قلت القصه كذا وكذا شرحت قصتي لاهل بيتي وسبب تأخري فأبكيت اسرتي معي
قالو لي وذلحين كيف قلت الثلاجه معنا ونحن مش بحاجتها انا حسبت الرجال بيبيع ثلاجه زياده عنده..
اخذت مبلغ مم اعطاني الله وطلعت راجع لصاحب الثلاجه دقيت الباب قال هلا ياعم خلاص اجيبها قلت ايوه خلاص بس عندي سؤال ايش ناقصك انت واسرتك قال تعال شف المطبخ بنفسك قلت لا خلاص مايحتاج ادخل يعني مافيش غير الماء بالماصوره قلت يالله تعال الحقني قال فين اجي قلت تعال لحقني ووصلنا الى دكان قريب اشتريت اغراض كما اشتري لبيتي وهو يتفرج ومنتظر وفي خاطره ان الاغراض لبيتي وهو بايحملها الى بيتي قال هاه باشوف سياره واجيبها بس معرفش بيتك انتظر ونمشي سوا قلت لا هذي الاغراض كلها لك انت وعيالك رجع يبكي في استغراب من صاحب الدكان والحاضرين زبائنه قالو جزاك الله الخير واعطاه ايضاً صاحب الدكان مبلغ والمقتدرين الموجودين ماحد قصر والله الذي تجلا في علاه هذه القصه لا زايد ولا ناقص واحمد الله واكثر له شكر كنت بحسب نفسي ان الناس مرتاحين وانا الضبحان له الحمد وله الشكر ماتعاقب الليل والنهار